Mɨrati’itsaritsiwa ‘ɨkitɨarikaya. Kiekataari wa’imierika yu’itsaritatɨ Américapa | Co.merr
27 mayo katsutɨtɨ ‘utinieretɨ 27 agosto 2023 wiitaari
Mɨrati’itsaritsiwa ‘ɨkitɨarikaya pɨrakatetɨa ‘imierikatsíe ‘íwaurika mayutiwewietɨya América kwieyaritsíe, mɨɨkɨ ‘itsarikayari hetsíe heuyutawaɨretɨ. Mɨrati’itsaritsiwatɨka mɨiretɨ mayukaxewi ‘iikɨ ‘uuximayátsikatsíe mɨɨkɨ mepɨtehekɨata tɨrɨkariyárika, ‘ɨwiyárika naime mɨtitama yuxexeɨriwaame tiwapini: Takwa pɨtiu’itsaritsiexime kepau ‘ikwai matɨa hikweitsika muyutaxewiriyatsíe.
Takwa tiyu’itsaritatɨ panuyɨne kename tiyu’ɨwiyatɨ, tiyu’itsarita, tiyukwa’á, tsiere tiyuxeɨritɨ yuheima mɨtitanuiretɨkɨ, maana tsɨ heitserie ‘imierika neyukutaiya, tineyutaxeiyatɨ; xɨka tiuka’itsarita ya xɨka ‘uyutamieni yuhepaɨ yutewi yetuame panuyɨne. Taipa yunaime waxarita mɨtiu’itsaritsiexime mɨɨkɨ kɨa mɨheukayune kename ‘ukári wamayɨitɨarika pɨrekumatiwa, kiekataari wa’uyé pɨkupata ke memɨteheuheinɨtsa heutinieretɨ. Waɨkáwa pareku wamierika ‘eena mɨyuhekɨa, ‘ukári mepɨtekahú mɨrati’itsaritsiwatsíe yuxewimekɨ memɨyuxeɨrie, memɨtekuxata tsiere memɨyuwaɨritɨa.
Co.Merr titewatɨ pɨti’uuximayáta rayexeiyatɨ wichi tiwewiyarikate, kiekaripa metá ‘ikwai, maanatsɨ mɨkarayumaɨwa hepaɨ tineyuku’uuximayáta. Naitɨ ‘uuwa mɨtihekɨatsíe mɨtiyukuxeɨrienikɨ, tuukari xatsikayari puyukuxeɨri, ‘ɨkiyaate, tumini parewiya ‘utɨarikayari, ‘ɨkiyaate muyuatɨka, xapate terɨwarɨwaame, xewitɨ kamixa, metá waɨkáwa tawarí timɨiretɨ pɨtiuyukuxeɨri.
‘Iikɨ hekɨatsika payuye’atɨa ‘ayɨweka internet hetsíe tiyuwaunetɨ, te’ɨtɨwaamete me’ayuyexeiyaku, te’itsaritaamete wahamatɨa tiyukuxatatɨ, hepaɨna Toledo piiniteya hetsíe tiyuparewietɨ, MAZ wa’uuximayátsika heyuxeiyakaku, mɨ ri wichi tiwewiyarika ‘ayukatetɨatɨ.
Taipa mɨrayuti’itsarita mɨtiuyuterɨwa estufa lorena, patsari ya ecotecnia tatsɨari kiekaripa tai mɨyɨ’ɨwiya, we’é matɨa tewi ‘aixɨ memɨteyuxeiya, mɨɨkɨ pɨ’inie kɨye mɨyutawaunikɨ ‘uuwa kitenie kita metá pɨ’inie ke pauka ra’iyaari yamɨtiuyɨni mɨtiyuka’itsaritakɨ.
Tsewiximarikatsíe, ‘imierikatsíe me’uyukutɨrɨkariyatɨ hipatɨ mepɨ’itsarita metewaákutɨ, menuakutɨ metá meyutɨrɨkariyatakutɨ.
Dea López
Wewiyarikate hekɨátame
