Tuupiriya — Hilda Palafox

6 tukaari yukatsutɨatɨ 2023 wiitaari, ‘uti’atɨ 7 ‘enerukɨ 2024

Maiyakamekɨ, tepɨtetimamateke kename tukaari hɨkɨa matiyune ‘ukári me’umawe nierika ‘amɨyeyeu wewiyarikate hetsíe. Paɨ tiuniuwa kename ‘ukítsi wa’iyaari mɨɨkɨ xeikɨa wamaiyá yutɨrɨkariya, kɨmana, teyunaitɨ tepɨteparewie ya xeikɨa mɨti’anenikɨ ‘ukítsi xeikɨa wapai memahekɨakakɨ.

Mɨpaɨ Hilda Palafox ‘uuximayátsikaya hetsíe tepɨteye’axɨa. Wewiyaya nierika ‘amɨyeyeu, yakɨ mɨyeyeu, metá tsatsaiyaya, ta’iyaari pɨwatayuitɨwa, mɨɨkɨ tsepa tsɨ wewiyarikaya ‘ukí wewiyateya hepaɨ mɨtiyuhekɨa, yemekɨ hepaɨna pɨkareku’iyaaritsietɨka. ‘Eena’i, xɨka waɨka ‘uyɨ’ɨwiya, pɨreyuti’enietɨyani kename nierikate tiyuku’iwaurita tita ranuyɨne ‘uká tita ri ta ‘ukí. Memɨtehekɨatsie, memɨtewewiyatɨka meputayuruwe kename tita xeikɨa ‘uká mɨranuyɨne, ‘apɨta ‘iyaarimekɨ yu’iwama mepɨwawima, mepɨte’ɨtɨa, mepɨtewewie. Metsɨ tuupiriya naná weriwe ‘atewa paitɨ yukwewirietɨ, mɨtikunamirieni pɨkayɨwe, naime pɨranutawaapa.

Tuupiriya, tuupiriya mawieriwe, ‘uká ‘axamɨtiuka’iyaari, ‘uká ‘axamaamá, mɨpaɨ pɨtiuterɨwarɨwa ‘iteɨri hau’erietɨ maweriwawe, tsepa ke mɨtiu’ane mɨwereni tsietɨ, kehate memikumaɨwa mɨwatitsikwakitɨwa, tsepa hakewa yuniwema “memɨwara’eiriwawe”.

Tɨrɨkaɨyemekɨ mɨtiwawewietsie, we’e hepaɨ herí mɨwakeni mɨkayɨwe, Hilda Palafox yuwewiyarikate hetsíe pɨtimaxiuta, pɨta’inie xaɨtsie pɨta teti’utɨ temɨtaniereni, tatsɨari, ‘iyaari mɨyetua yeme pɨka’anuyɨne ‘uká xeikɨa mɨtikamie pɨta yunaitɨmexi. ‘Aixɨ ‘eeriya hetsie ‘axamaamá tsiere panuyɨne ‘aixɨ ‘iyaari tuayame.

Viviana Kuri