Kakai ‘amanatɨtɨ 

Programa de Moda y Diseño Contemporáneo

Katsutɨ 3 febrero mutiniere 7 julio 2024 wiitaari

“Uximayátsika tepatiweiyarɨme wichi mɨti’anene hetsíe tekanieretɨ, piinite wichi tixeiyarikate. Mɨɨkɨ tsɨri tewi waɨká timaiyaya hetsíe, heinɨtsikaya hetsíe. Piini tixeiyarika”.

— Matter Matters xeɨriyaya

Kakai ‘amanatɨtɨ hetsíe matɨari memeu’ui mepɨte’uyuri kawayute hetsíe memɨyaxikekai mɨɨkɨ pɨtiyɨane siglo X, persa reyetewakaku herí ta ‘ukítsi xeikɨa mepeu’ukai. ‘Ɨtɨmana siglo XI, Europa mɨtiyɨane ‘ukí kehate tumini memumanakai mɨɨkɨ kakai yamɨ’anenetsíe meheu’uwetɨ meputayua. ‘Imatɨrieka ri siglo XIX tiuyuxewiriyaxɨ kename ‘ukári xeikɨa tiwakakaitɨkai. Tsita-tsita pekɨyɨne mɨɨkɨ kakaitsíe xɨka peuwetɨ pe’umieni, ‘aixɨ tsɨ yuxeiyanɨatɨ, ‘utiniutɨ tsɨri.

‘Iikɨ ya mɨ reyukuhaneme piini mɨhekɨata tɨrɨkaɨyemekɨ ‘iyaari maiyá pɨheuyewetse, ‘axa mɨkareyuti’eniɨriɨkɨnikɨ. Kakai ‘amanatɨtɨ ‘aixɨ pɨka’uyɨtɨka, ‘axa pɨrayukeka metá tixaɨtɨkɨ pɨkatiyunaki’erie, ‘apɨta ‘ɨkate pɨtikukwinitɨwa, wari pakatuna, merikɨ tawie pɨwayetaima. Karikɨ pɨranutahuhutare, ‘iikɨ piini wichi tiyuxexeiyame hetsiena xɨka heuweni ‘aixɨ pɨkatiuyuaneni, heitseriemekɨ ‘aixɨ pɨkatiukekani. Mɨ ri ta waɨkawamekɨ pa’eriwa mɨyuheiwe’erinɨakɨ tsepa xeníu mɨkayunaki’erie. ‘Eena Kakai ‘amanatɨtɨ mɨhekɨatsie mɨiretɨ pɨti’ane 100 kakai ‘a’anatɨtɨ yutsata ‘anenetɨ, yutsatakɨ tiwewiyatɨkaitɨ, tiuyutiyeikeka yemekɨ tita mɨranuyune mɨɨkɨ naitɨ pɨtiuyukuxeɨri.